कुराकानी : बसन्त गौतम सँग

नेपाली इन्टरनेट जगतमा साहित्यमा चासो राख्नेहरु माझ बसन्त गौतमको परिचय गराइरहनु पर्दैन l बसन्त गौतम पेशाले इंजिनीयर हुनुहुन्छ l साहित्य तथा लेख रचनामा उहाँको कलम सशक्त रुपमा चलेको छ l साहित्यमा मात्र नभै उहाको कलम समसामहिक राजनैतिक अबस्थाको बारेमा पनि चल्ने गरेको छ l उहाँ संग sunmala.comले हाल सालै कुराकानी गरेको छ l

• तपाइको नेपाल बसाई कस्तो भैरहेको छ ?

राम्रो भईरहेको छ। दैनिक जीवनको कार्यतालिकालाई नियमित र सहज पार्न र यहाँको जीवनमा फेरि अभ्यस्त हुन केहि समय त अबश्यनै लाग्छ। लगभग एक महिना भयो म फर्केको, अब त धेरै मिलिसकेको छ।

• पहिला को नेपाल र अहिलेको नेपाल मा केही भिन्नता पाउनु भो की ?

धेरै मान्छेहरुले सोध्ने प्रश्न हो यो। सतहमा हेर्दा धेरै फरक देखिन्छ। हिजो राजतन्त्र थियो, आज गणतन्त्र छ। देशका सरकारी संरचनाहरु पनि त्यसै अनुसार सतहमा मात्रै परीवर्तीत भईरहेका देखिन्छन्। तर परीवर्तनले जुन सकारात्मक दिशा दिनसक्नुपर्थ्यो देशलाई, त्यो भने बिल्कुलै देखिँदैन। प्रणालीका संचालकहरु फेरिएपनि मूलभूत रुपमा हामी उही र उस्तै प्रणालीको ‘शिकार’ बनीरहेका छौं। हिजो शाशन गर्नेहरु र आजका हर्ताकर्ताहरुमा चारित्रिक भिन्नता छँदैछैन। सकारात्मक कुराहरुका लागि कहिल्यै सहमति नबने पनि भ्रष्टाचार गर्न र देशका स्रोत-साधनलाई नीजि र दलीय स्वार्थका लागि दुरुपयोग गर्न दल र नेताहरुका बीच जहिले पनि आम सहमति देखिन्छ। गाऊँ देखि राष्ट्रिय तहसम्म यो एउटा आम प्रवृत्ति बनेको छ। नीतिगत निर्णयहरु र नियुक्तिहरुमा पनि दलीय भागबण्डाको कुसंस्कृतिलाई स्थापित गरिसकिएको छ।